Viri Galilaei quid admiramini aspicientes in caelum alleluia quemadmodum vidistis eum ascendentem in caelum ita veniet alleluia alleluia alleluia

Omnes gentes plaudite manibus jubilate deo in voce exsultationis

Alleluia Ascendit deus in jubilatione et dominus in voce tubae

Alleluia Dominus in Sina in sancto ascendens in altum captivam duxit captivitatem

Viri Galilaei quid admiramini aspicientes in caelum hic Jesus qui assumptus est a vobis in caelum sic veniet quemadmodum vidistis eum ascendentum in caelum alleluia

Cumque intuerentur in caelum euntem illum ecce duo viri astiterunt juxta illos in vestibus albis qui et dixerunt

Ascendit deus in jubilatione dominus in voce tubae alleluia

Omnes gentes plaudite manibus jubilate deo in voce exsultationis

Quoniam dominus summus terribilis rex magnus super omnem terram

Subjecit populos nobis et gentes sub pedibus nostris

Psallite domino qui ascendit super caelos caelorum ad orientem alleluia

Alleluia Dominus in Sina in sancto ascendens in altum captivam duxit captivitatem

Alleluia Ponis nubem ascensum tuum domine qui ambulas super pennas ventorum

Summi triumphum regis prosequamur laude | Qui caeli qui terrae regit sceptra inferni jure domito | Qui sese pro nobis redimendis permagnum dedit pretium | Huic nomen exstat conveniens Idithun | Nam transilivit omnes strenue montes colliculosque Bethel | Saltum de caelo dedit in virginalem ventrem inde in pelagus saeculi | Postquam illud suo mitigavit potentatu tetras Phlegetontis assiliit tenebras | Principis illius disturbato imperio | Maniplis plurimis inde erutis mundum illustrat suo jubare | Captivitatemque detentam inibi victor duxit secum | Et redivivum jam suis se praebuit servis et amicis | Denique saltum dederat hodie maximum nubes polosque cursu praepeti transvolans | Celebret ergo populus hunc diem credulus cujus morbida Idithun corpora in semetipso altis sedibus caeli invexit dei filius | Et tremens judicem exspectet adfuturum ut duo angeli fratres docuerunt | Qui Jesus a vobis assumptus est in caelum iterum veniet ut vidistis eum | Nam Idithun nostrum vocibus sedulis omnes imploremus | Ut a dextris patris qui sedet spiritum mittat nobis sanctum | In finem saeculi ipse quoque semper sit nobiscum

Christus hunc diem jucundum cunctis concedat esse christianis amatoribus suis | Christe Jesu fili dei mediator naturae nostrae ac divinae | Terras deus visitasti aeternus aethera novus homo transvolas | Officiis te angeli atque nubes stipant ad patrem reversurum | Sed quid mirum cum lactanti adhuc stella tibi serviret et angeli | Tu hodie terrestribus rem novam et dulcem dedisti domine sperandi caelestia | Te hominem non fictum levando super sidereas metas regum domine | Quanta gaudia tuos replent apostolos | Quis dedisti cernere te caelos pergere | Quam hilares in caelis tibi occurrunt noveni ordines | In humeris portanti diu dispersum a lupis gregem unum | Quem Christe bone pastor tu dignare custodire