Domine deus noster cujus gratia beatus Martinus tres mortuos resuscitavit concede propitius ut per ejus interventum a morte animae resuscitari mereamur

Martinus Abrahae sinu laetus excipitur Martinus hic pauper et modicus caelum dives ingreditur hymnis caelestibus honoratur

Martinus episcopus migravit a saeculo vivit in Christo gemma sacerdotum

O beatum virum cujus anima paradisum possidet unde exsultant angeli laetantur archangeli chorus sanctorum proclamat turba virginum invitat mane nobiscum in aeternum

Intercede pro nobis beate pontifex Martine ad dominum Jesum Christum apud quem est misericordia in perpetuum

Dixerunt discipuli ad beatum Martinum cur nos pater deseris aut cui nos desolatos relinquis invadent enim gregem tuum lupi rapaces

Domine si adhuc populo tuo sum necessarius non recuso laborem fiat voluntas tua

O virum ineffabilem nec labore victum nec morte vincendum qui nec mori timuit nec vivere recusavit

Oculis ac manibus in caelum semper intentus invictum ab oratione spiritum non relaxabat alleluia alleluia

Martinus Abrahae sinu laetus excipitur Martinus hic pauper et modicus caelum dives ingreditur hymnis caelestibus honoratur

O beatum pontificem qui totis visceribus diligebat Christum regem et non formidabat imperii principatum o Martine dulcedo medicamentum et medice o sanctissima anima quam etsi gladius persecutoris non abstulit tamen palmam martyrii non amisit