Sancta Maria clemens et pia quae servato castitatis pudore genuisti salvatorem tuis succurre miseris quos intentio debilitat carnalis ac fragilis

Ut tuo nos interventu muniti caelesti palatio mereamur adscribi

Christi virgo dilectissima virtutum operatrix opem fer miseris subveni domina clamantibus ad te jugiter

Quoniam peccatorum mole premimur idcirco te petimus

Gaude Maria virgo cunctas haereses sola interemisti quae Gabrielis archangeli dictis credidisti dum virgo deum et hominem genuisti et post partum virgo inviolata permansisti

Gabrielem archangelum scimus divinitus te esse affatum uterum tuum de spiritu sancto credimus impraegnatum erubescat Judaeus infelix qui dicit Christum ex Joseph semine esse natum

Post partum virgo inviolata permansisti dei genetrix intercede pro nobis

Dignare me laudare te virgo sacrata da mihi virtutem contra hostes tuos

Benedicta filia tu a domino quia per te fructum vitae communicavimus

Corde et animo Christo canamus gloriam in hac sacra sollemnitate praecelsae genetricis dei Mariae

Cum jucunditate memoriam beatae Mariae celebremus ut ipsa pro nobis intercedat ad dominum Jesum Christum