Ecce nomen domini Emmanuel quod annuntiatum est per Gabrielem hodie apparuit in Israel per Mariam virginem magnus rex

Pastores dicite quidnam vidistis et annuntiate Christi nativitatem infantem vidimus pannis involutum et choros angelorum laudantes salvatorem

Virgo dei genetrix quem totus non capit orbis in tua se clausit viscera factus homo vera fides geniti purgavit crimina mundi et tibi virginitas inviolata manet

Virgo verbo concepit virgo permansit virgo peperit regem omnium regum

Ecce agnus dei ecce qui tollit peccata mundi alleluia

Natus est nobis hodie salvator qui est Christus dominus in civitate David

Natus est nobis deus de deo lumen de lumine quod erat in principio

Nesciens mater virgo virum peperit sine dolore salvatorem saeculorum ipsum regem angelorum sola virgo lactabat ubere de caelo pleno

Gaudeamus omnes fideles salvator noster natus est in mundo hodie processit proles magnifici germinis et perseverat pudor virginitatis

Ecce jam veniet plenitudo temporis in quo misit deus filium suum in terris

Beatus venter qui te portavit Christe et beata ubera quae lactaverunt dominum et salvatorem mundi

O regem caeli cui talia famulantur obsequia stabulo ponitur qui continet mundum jacet in praesepio et in nubibus tonat

Glorificamus te dei genetrix quia ex te natus est Christus salva omnes qui te glorificant

Ecce de quo Joannes dixit Christus natus est in Israel et regni ejus non erit finis